يا أمه بناديلك....نجيب سرور

لتحميلها بصوت نجيب سرور، إضغط هنا

يا أمة بناديلك، قيدي قناديلك، لمي مناديلك
والله لأغنيلك أحلى كلام ينقال
وأخضّر الغيطان، و أنقش على الحيطان
عيدان يا نخل عيدان، ولكل زرع اوان
مابين جرس و آدان
الصبر يا فرسان،، المهرة للخيال
يا أمة بناديلك، قيدي قناديلك

وأذوقك جنة، بالورد و الحنة
ويا قصعة يا مشنة، يا مناولة للبنا
الهمة يا ابطال
يا أمة بناديلك، قيدي قناديلك

يا ام الايدين الشهد، متودكة في الصهد
البحر جزر و مد
والله ما زيك حد
يا امه يا رب رجال
يا أمة بناديلك، قيدي قناديلك

يا ام العجين خمران، خمران بقاله زمان
بينادي على الفران، يا معلمة الإنسان
بالغنوة و الموال
يا أمة بناديلك، قيدي قناديلك

يا ام البساط ممدود، و الجوده م الموجود
لو حتى مش بدود، على القانون و العود
ولا فتة البطال
يا أمة بناديلك، قيدي قناديلك

يا امه في ساعة الجد، يبقى الوعيد و الوعد
فداكي أب وولد، لو حتى حيلي اتهد، عنك و انا الشيال
يا فلاحين يا جنود
يا شغالين يا اسود
يا مثقفين يا بنود
سجال يا حرب سجال

محذوف

أكم و كام إتفاق، و ليلى فين في العراق؟؟
ولا في واء الواء؟
طبيبها هو النضال
يا أمة بناديلك، قيدي قناديلك
طب يبقى ليه الخناق،، يا رفاقة ليه الفراق بيننا
وأهل النفاق، عاملينها فتة رقاق
ملفوفة طرحة و شال
يا أمة بناديلك، قيدي قناديلك

لمّوا الصفوف لموا، و ع الغنا اتلموا
همّوا بقى همّوا ، و قولو معانا أمال:
يا أمة بناديلك، قيدي قناديلك، لمي مناديلك
والله لأغنيلك أحلى كلام يتقال

نجيب سرور