في أرض النفاق

إستغربت أوي أمر البنات اللي كل ما أحاول اتكلم معاهم في موضوع عدم فرضية الحجاب و هما أصلا مش محجبات ألاقيهم ضد كلامي إزاي أقول الحجاب مش فرض أنا أكيد مش فاهمة حاجة في الدين
....

و أنا في ثالثة إعدادي غطيت شعري و كان هو ده مفهومي عن الدين الصح و عن إني أكون فتاة محترمة مع إني طول حياتي كنت محترمة, المهم بعد إعتراضات كثيرة من أهلي على فكرة إني أغطي شعري لأسباب هبقى أكتبها مرة ثانية في موضوع عن الحجاب نجحت في إني أعمل اللي أنا عايزاه و إتحجبت فعلا في أواخر ثالثة إعدادي.

و بعد مرور حوالي خمس سنوات عندما أصبحت في تانية جامعة قلعت الحجاب و ده بعد ما إقتنعت انه كان قرار أنا اتخذته عشان كل اللي حوالية بيعملوا كده و عشان كنت فاهمة إن لو غطيت شعري هبقى إنسانة محترمة, و بعد ما قرأت كثير و بدأت أفهم حاجات ما فكرتش فيها لما غطيت شعري.

أول ما قلعت الحجاب دخلت في جدالات كثيرة جدا عن أسباب رفضي لفكرة الحجاب و عدم إقتناعي بها و كان أهم النقاط اللي النقاشات بتبقى فيها إن أنا عندي الحق في إني أغطي شعري أو ما أغطيش بس ما أتكلمش في إن الحجاب مش فرض.

كان البنات اللي حوالية مش محجبات بيُستفزوا أوي لما أقولهم إن الحجاب مش فرض , كنت بسألهم دايما ليه لو انتم مقتنعين بفرضية الحجاب ليه مش مغطيين شعركوا كانوا بيردوا بإجابه كلها ثقة و إقتناع تام بإن لسه ربنا مش هداهم للحجاب و هما ناويين يتحجبوا في يوم بس لسه مش دلوقتي و طبعا الناس كانت بتشوف كلام البنات دي هو العقل كله و أنا اللي بقوله ده تخاريف.

إزاي واحدة تكون مقتنعة بفرضية الحجاب و ان المفروض تكون محجبة بس شايفة إن لسه لم يأتي الميعاد اللي الإله حدده لها لتغطية شعرها , مش المفروض اللي مقتنع بحاجة بيعملها ولا هو الطبيعي إني أفضل أقول أنا هعمل كذا و كذا عشان ده الصح و أكيد في يوم هبقى محجبة لكن مش دلوقتي, يعني الواحدة تبقى عارفة انها بتعمل حاجه غلط و مستمرة فيها مش مشكلة طول ما هي بتقول اه أنا غلط ....
نفاق ده ولا أنا بيتهيألي ؟؟!!
كذب ده و ضحك على النفس ولا لأ؟؟
...................

يعني إيه يطلع قرار بمنع المواقع الإباحية داخل مصر و إحنا داخل جامعتنا بيحصل زي اللي في المواقع دي !!!

ليه كل ما أروح الجامعة ألاقي الطلبة مش في محاضرتهم و كل ولد و بنت قاعدين لازقين في بعض و قربوا يدخلوا جوه هدوم بعض و بعد كده ييجوا يكلموني في الحرام و الحلال و العيب و تقاليد وعادات متخلفة لمجتمع فاسد و يوم ما أرفض الحجاب أبقى أنا اللي مش محترمة عشان برفض إني أكون منافقة عشان برفض حاجه أنا مش مقتنعة بها....

ليه في الإمتحانات ممكن نغش بس بصوت واطي ؟؟

يعني إيه المسلمين و المسيحيين بيحبوا بعض و مفيش ولا فرق في المعاملة و لا فتنه طائفية ولا الكلام الشرير اللي بيتقال اللي ده لكن على طول بنسمع كلمة:
" ده مسيحي..صح؟؟ "

يعني إيه ممكن إثنين مش متزوجين يمارسوا جنس في شقة مادام محدش شايفهم لكن لو حضنوا بعض في الشارع يبقى فعل فاضح ؟؟
فعل فاضح ليه يعني ؟؟

ليه الولد يشرب سجاير عادي و البنت برده بتشرب سجاير بس مش عادي و متقدرش تعملها قدام أهلها طول ما الحاجات دي في السر مفيش مشاكل !!!

ليه لما أنا حاولت أقول أفكاري بصوت عالي الناس هاجمتني و شافوني بحاول أنشر فسادي في المجتمع اللي أصلا فاسد ؟؟
ليه أهلي حاولوا يقنعوني إني أقول إني تراجعت عن أفكاري قدام الناس بس و اللي جوايا يفضل جوايا ؟؟
ليه الناس ممكن تعمل أي حاجه ما دام محدش شايفهم لكن لو حد شافهم يبقوا مش محترمين و يبقوا بيعملوا قلة أدب؟؟

ليه الأطفال و هما صغيرين بنفرح بيهم أوي لما يشتموا و لما يكبروا نقول لهم كده عيب انتوا مش متربيين ؟؟ اه هما مش متربيين , بس هو مين اللي مش رباهم ولا مين اللي علمهم قلة الأدب جوه لكن بره لأ ؟؟ مش المجتمع ولا ناس تانية غير اللي في المجتمع ده؟؟
مش المجتمع اللي فهمنا إن المشكلة مش في عدم وجود غسيل( وسخ ) المشكلة تبدأ لو نشرنا الغسيل ده و الناس شافته !!!

إيه التناقض الغريب ده , ايه الإزدواجية اللي عايشين فيها دي ؟
إيه المجتمع اللي بيعشق الحياة في الظلام ده ؟

المجتمع ده هو إحنا , إحنا اللي عملنا المجتمع ده لما قلنا إن إحنا لسه كويسين و مصر لسه بخير و إحنا ماليانين كذب و نفاق و تناقض.
إحنا اللي بنقبل و بنرفض.
قوانين المجتمع إحنا اللي بنصنعها عشان نمشي عليها ,
إحنا اللي بنختار نعيش خايفين من حكم المجتمع علينا ,
لو بصينا لنفسنا قبل ما نحكم على أفعال غيرنا هنلاقي إن الأولى نحل العقد و المشاكل اللي فينا,
لو قررنا إننا نقبل إختلافات بعض هنبدأ نتحرك للأمام.
هنتغلب على التخلف اللي فينا و مش هيبقى كل اهتمامتنا بتنحصر في الحكم على الاخر.
عايزين حرية ؟؟؟؟؟
اه عايزين حرية , بس أكيد الحرية مش هتيجي لوحدها ,الأول نهدم السور اللي بنيناه حوالين عقولنا عشان ما نعرفش نشوف ( غير تحت رجلنا ) و بس .
لازم نتغلب على خوفنا من الإختلاف , محتاجين نبقى مختلفين عن بعض , محتاجين يبقى كل حد فينا بيفكر , مش فرد بس اللي مسئول عن التفكير والباقي ماشي وراه.
كفاية نفاق , نبدأ نعمل اللي مقتنعين بيه , ندافع عن أفكارنا عشان أفكارنا دي هي إحنا.
لو هنفضل عايشين ب فكر إحنا مش فاهمينه ولا مقتنعين بيه نبقى منافقين , بننافق نفسنا قبل أي حد تاني , مش هنبقى عايشين حياتنا إحنا.

أنا عن نفسي قررت أعيش حياتي أنا مش حياة حد تاني
.........

فدوى